Pussibil fitâ postazions par paruchîrs e centris estetics

In curt i salons di paruchîr e i centris estetics di Udin a podaran fitâ lis lôr postazions di lavôr a altris operadôrs. Cun di fat, il Comun, in cunvigne cun Confartesanât e CNA, al à decidût di introdusi in vie sperimentâl cheste pussibilitât za in vore in diviers paîs europeans, ma che in Friûl – Vignesie Julie no si le veve ancjemò mai viodude. Intune situazion economiche come chê di vuê, une pussibilitât di cheste fate e permet sei di ridusi il lavôr abusîf, sei di promovi il sisteme des piçulis rêts di imprese. La iniziative e à otignût il vie libare sei dal Ministeri talian competent, sei de Regjon. Une volte rivade insom la sperimentazion, si decidarà se inzornâ l’acuardi e si viodarà se a coventin dai mioraments.