Sierade la prime part dai lavôrs inte ex caserme Osoppo

Si è sierade la prime part dai lavôrs di recupar de ex caserme Osoppo. L’intervent al à cjapât dentri la palacine di vie Brigata Re che in curt e deventarà la “cjase des associazions”. Pai lavôrs a son stâts spindûts 700 mil euros. Intal detai: a son stâts metûts in sest ducj i doi plans dal edifici che si slargje suntune superficie di un miâr di metris cuadris. Lis associazions a varan a disposizion une cuarantine di salis. In curt al sarà publicât il bant pe assegnazion dai spazis. La seconde part dal progjet e previôt di meti in sest une part de aree esterne. O ricuardin che la aree de ex caserme si slargje suntune superficie che e cuvierç in dut su par jù 11 etars e che intal complès a son logâts diviers edificis suntune superficie totâl di 150 mil metris cubis.