Iniziativis pai 25 di Avrîl

E je stade presentade îr intune conference stampe dal sindic di Udin, Furio Honsell e dal assessôr comunâl pe culture, Federico Pirone, la iniziative “46° parallelo. La guerra dappertutto.” che e previôt diviers events par celebrâ la fieste de Liberazion. Chest an a saran vierts al public i ricovars antibombardament dai Zardins dal Torso, di vie del Sale e di Zardin Grant. Sabide ai 26 di Avrîl, ai 3 e ai 10 di Mai di 15 a 18 al sarà pussibil visitâ, sore nuie, i ricovars, in graciis de colaborazion cul Archivi di Stât di Udin. Al museu Etnografic dal Friûl in vie Grazzano invezit dai 25 di Avrîl ai 2 di Mai e je in program la mostre “Vivere in guerra” realizade in colaborazion cul Archivi di Stât. Ancje Cjase Cavazzini e da il contribût ae iniziative cu la mostre “Mappa della resistenza in Friuli” cu lis oparis di Afro Basaldella. Simpri in colaboirazion cun Cjase Cavazzini dai 9 di Mai intal Salon dal Popul a Palaç D’Aronco e sarà vierte la mostre “Dal cuor della terra” cu lis oparis di Guido Tavagnacco. Za vierte dai 18 di Avrîl aes Galariis dal Progjet di palaç Morpurgo la mostre “La Rosa Bianca” che e restarà vierte fin ai 4 di Mai. La cerimonie uficiâl e je in program ai 25 di Avrîl cuntun corteu che al partirà a 9.45 di Zardin Grant viers place Libertât e che dopo si movarâ intal plaçâl XXVI Luglio. A tacâ di 13 intal parc dal ex ospedâl psichiatric di Sant Svualt la zornade de Liberazion si sierarà cun “Resistenza in festa” inmaneade de Anpi di Udin.