Cul prin di Mai puest di ristorazion intal parc Moretti

Servizis gnûf e un pont di ristorazion in stât di funzionâ 365 dîs ad an par rindi il parc Moretti un “zardin” di podê doprâ in ogni stagjon. Cun cheste obietîf la Aministrazion comunâl e à presentât la gnove struture che a partî dal prin di Mai e ufrirà un servizi bar continuatîf alì de aree verde di vie Mentana. La struture, là che si darà fûr sei di mangjâ che di bevi, e je logade intun sît che al pues dâi acet a di uns trente personis a sotet, intant che su la plateforme in ciment li dongje a podaran cjatâ puescj taulins e cjadreis par altris concuante personis. La struture a sotet e je in len e in veri di 10 metris par 10 e cuntun impat ambientâl bas. La gjestion dal chiosc e je stade vinçude de dite Montedoro che lu varà in concession fintremai il Dicembar dal 2016 a front di un cjanul di 6 mil euros. Dongje de struture di ristorazion a son stâts preparâts dai trois di acès e intes prossimis setemanis si larà a completâ il sisteme di lûs publichis a servizi de aree. Dulintor dal chiosc e sarà po preparade une aree di 500 metris cuadrâts lassade a prât pes ativitâts ludichis, là che vie pal Astât si varan zûcs di aghe e vie pal Unvier une struture par davuelzi a sotet zûcs e events.