Miercus ae Joppi presentazion di “Impariamo l’Europa”

Ancje chest an la biblioteche civiche di Udin e ricuarde la Zornade de Europe, che e cole ai 9 di Mai, e lu fâs cuntun event in program miercus ai 7 di Mai a sîs sot sere (18.00) li de sale Corgnali de Sezion Moderne de biblioteche ‘V. Joppi’. Te ocasion si varà la presentazion dal libri di Renato Damiani “Impariamo l’Europa”. Il libri al è svilupât su cinc cjapitui e al presente la storie de integrazion europeane, lis ideis e i valôrs di fonde de Union europeane, il funzionament dai siei orghins e la dimension de partignince europeane inclusive e solidarie. I temis frontâts te publicazion a saran discutûts dal autôr adun cun Marco Stolfo de Universitât dal Friûl e cun Silvio Moro, president de Cjase pe Europe di Glemone, editore dal volum. L’apontament al è inmaneât in colaborazion cul Sportel pe lenghe furlane dal Comun di Udin e cul Modul Jean Monnet ‘MuMuCEI – Multilingualism, Multicultural Citizenship and European Integration’ de Universitât dal Friûl. La publicazion si pues discjamâle ancje di internet su cheste direzion.