“BEurope” par svicinâ i zovins ae Europe

In ocasion dai 9 di Mai, zornade de Europe, la citât di Udin a promovarà un program vivarôs di apontaments e iniziativis par sensibilizâ i zovins e i citadins al teme des istituzions europeanis. “BEurope. Volti, voci, viaggi: vita dei giovani europei” a je tal particolâr la iniziative inmaneade dai 8 ai 22 di Mai de Agjenzie Zovins dal Comun, par mieç dal servizi Informagiovani e cu la partecipazion di diviers ents e associazions dal teritori. Ducj i apontaments a varan tant che obietîf la presentazion de Europe, de so storie, lis sôs ocasions di formazion, lavôr e volontariât. Come che al à sclarît l’Assessôr comunâl pe Culture, Federico Pirone, jessi Europe al vûl dì vê cussience di vivi intune suaze cambiade, multiculturâl e plurilinguistiche. A saran duncje diviers i events in program: joibe ai 8, sabide ai 17 e vinars ai 23 di Mai a son previodûts trê apontaments sul teme des istituzions europeanis cu la partecipazion dai students dai istitûts Percoto e Uccellis che a àn sperimentât un tirocini o stage alì dai uficis di Bruxelles e che a contaran cussì la lôr esperience di lavôr, scuele, viaç. I apontaments a son vierts a ducj e a son sore nuie. Par informazions si pôl indreçâsi sul sît www.informagiovani.udine.it e seguî i events su twitter cul hashtag #BEurope.