Lavôrs al Carnera, il Comun al fasarà ricors

Il Comun di Udin al fasarà ricors cuintri de sentence dal judiç dal tribunâl di Pordenon sul ricors fat indenant de dite Polese spa di Sacîl par no paiâ al Comun i passe 167 mil euros di fideiussion a garanzie dal completament dai lavôrs par slargjâ e meti in sest il palasport Carnera. Pe avocadure dal Comun a son i elements par domandâ il paiament de cifre, in plui dai dams che si domandaran cuntune altre procedure. Cun di fat, dopo vot mês de prime consegne dai lavôrs, dopo cinc de consegne definitive dal cantîr e dopo plui di trê mês de firme dal contrat la Polese e veve fat a pene il 7% dai intervents previodûts. I lavôrs a jerin stâts consegnâts in vie definitive ai 3 di Dicembar dal 2012, l’apalt al previodeve une spese totâl di 2 milions 429 mil euros e il timp par consegnâ la opare al jere di 200 dîs. Par chestis resons, a spieghin i avocats dal Comun, “e je palese la volontât de imprese di no puartâ indenant il contrat che si veve impegnade a rispietâ”.