Al è di 156 milions il belanç di prevision pal 2014
La Zonte e à fat bon il belanç di prevision pal 2014 dal Comun di Udin che si siere sui 156 milions di euros. Su la manovre a pesin sei la riduzion dai trasferiments leade ae de situazion economiche e finanziarie gjenerâl, sei il pat di stabilitât. La introduzion de Impueste Uniche Comun formade di Imu, Tasi e Tari e puarte invezit a incressi la pression fiscâl sui citadins. Lis jentradis a son sui 150 milions di euros, plui un altri milion vanzât de gjestion precedente. Plui in detai si trate di 65,9 milions che a rivin di trasferiments, 53 milions di jentradis tributariis e 30 milions di jentradis extratributariis. Rispiet al 2013 la riduzion dai trasferiments regjonâi e je stade dal 3%, intant che par chel che al rivuarde il pat di stabilitât il Comun di Udin al à otignût spazis finanziaris par sù par jù 950 mil euros, cuintri dai cuasi 6 milions e mieç dal an passât. Il cuadri des jentradis disponibilis al permet spesis par 137 milions, che i si zontin 14 milions par rimborsâ mutuis e prestits. La vôs di spese plui alte, ven a dî passe 55 milions, e je rapresentade di prestazions di servizis; uns 30 milions a van pe gjestion e pal funzionament; plui o mancul 17 milions e mieç a van sei par cuvierzi ativitâts culturâls, turistichis o pai zovins fatis dal Comun; une cifre similâr e à di jessi invezit tornade ae Regjon par ecès di jentradis de Imu; 16 milions e mieç a laran vie par contribûts, 7,2 milions par servizis in convenzion tant che museus, implants sportîfs e servizis scolastics, e 1,2 milions par comprâ bens pes ativitâts comunâls. Il program dai lavôrs publics al scugne tignî cont des limitazions dal pat di stabilitât e al à a disposizion 5,4 milions che a laran soredut par intervents di manutenzion straordenarie. Tra chescj a son i lavôrs par meti in sest lis scuelis Manzoni (400.000) e Ellero (1.562.000). In gracie dai spazis finanziaris lassâts de Regjon si podarà ancje fâ sù une taronde al puest de crosere jenfri vie Cjarande e vie Bariglarie e puartâ insom i lavôrs alì dal implant sportîf Dal Dan.