70 iniziativis a Udin pe Zornade mondiâl dal zûc

Ancje chest an Udin al aderìs ae Zornade mondiâl dal zûc, event promovût a partî dal 1999 de Associazion internazionâl des ludotechis, e lu fâs cuntune edizion di record par numars di events, di lûcs e di colaborazions. L’apontament si sviluparà su dôs zornadis – sabide ai 31 di Mai e domenie prin di Jugn – cun 70 iniziativis e in gracie de colaborazion cuntune cincuantine tra ents, scuelis e associazions. Il calendari al è stât presentât ai 28 di Mai a palaç D’Aronco cu la partecipazion dal sindic, Furio Honsell, e dai assessôrs Raffaella Basana e Alessandro Venanzi. Lis iniziativis si davuelzaran tra cuatri dopodimisdì e vot di sere (16.00 – 20.00) in 22 lûcs diviers dal centri, ven a dî: zardins dal Tors, Ludoteche, place S. Jacum, place XX Settembre, place Venerio, teatri S. Zorç, place Garibaldi, vie Lionello, cort Morpurgo, vie Cavour, vie Savorgnane, Marcjât Vieri, biblioteche Joppi, sale Ajace, splaç dal Cjistiel, Cjase de Contadinance, Zardin Grant, puarti dal Lippomano, loze di S. Zuan, loze dal Lionel, place Libertà, e librerie Feltrinelli. Si trate di zûcs, ma ancje di laboratoris e conferencis, cence dismenteâ i passe 500 zûcs di taule a disposizion alì de Ludoteche che, pe ocasion, e restarà vierte al public fintremai vot di sere (20.00). L’event si tignarà ancje in câs di brut timp, dal moment che la plui part des iniziativis e pues jessi spostade a sotet. Il program detaiât de manifestazion si pues cjatâl sul sît internet www.comune.udine.it .