Lis propuestis dai fruts par miorâ la citât

Ai 28 di Mai il sindic Furio Honsell e la assessore Raffaella Basana si son cjatâts cul Consei comunâl dai fruts e dai fantats e cun altris dusinte fruts de scuele primarie Rodari e des scuelis secondariis di prin grât Tiepolo, Valussi, Fermi e Bellavitis che ur àn presentât lis lôr propuestis par miorâ la citât. Tantis lis ideis fatis indenant, une tra lis plui inovativis e je stade di meti sù dai “ponts di ricicli sportîf” dulà lassâ imprescj e vistîts sportîfs doprâts ma ancjemò in cundizions buinis, di maniere che a puedin lâ a cui che a ‘ndi à dibisugne. Tra lis domandis e lis propuestis fatis indenant di fruts e fantacins o vin po chês di armaruts a scuele, de racuelte diferenziade intes mensis scolastichis e de incressite dal numar di fontanis ator pe citât.