Vuelis doprâts, un miâr di bussulots pe racuelte dâts fûr

A doi mês de partence de campagne inviade dal Comun e de Net pe racuelte dai vuelis vegjetâi doprâts, a son za plui di un miâr i bussulots dâts fûr pe racuelte. La iniziative e previôt la assegnazion in ûs gratuit ai citadins che ju domandin di passe 3.200 bussulots di 3 litris e mieç pal recupar dai vuelis vegjetâi doprâts in cjase par fâ di mangjâ. In dì di vuê a restin duncje disponibii ancjemò uns 2.000 bussulots. La campagne e je stade inviade in gracie dai bêçs dal premi pes aministrazions plui ativis intal riciclâ otignût dal Comun di Udin l’an passât. I bussulots a puedin jessi ritirâts alì de sede operative de Net, in vie Gonars 44, intant che pe consegne dai vuelis doprâts si varà di lâ alì dai centris di racuelte di vie Rizzolo e di vie Stiria. Vuê a Udin si cjapin sù 12 toneladis di vuelis vegjetâi doprâts ogni an e, cun cheste campagne, si ponte a incressi ancjemò di plui chest dât. Se dispierdûts intal ambient i vuelis a incuinin une vore, ma se si ju ricicle a permetin di produsi combustibii alternatîfs a chei tradizionâi.