Fat bon il belanç di prevision 2013

Il Comun al à fat bon il belanç di prevision 2013. Bloc di Irpef e Imu, atenzion ai puescj di vore e tutele dai nivei dai servizis: a son chescj i trê ponts di fonde dal document. La Zonte in particolâr e à pontât su la razionalizazion e su la riduzion des spesis intermediis, ven a stâi chês pal riscjaldament e pe energjie eletriche, pal personâl, pes lûs publichis e pai carburants. Il belanç di prevision, che al è sui 175 milions di euros, al previôt sù par jù 144 milions di euros di spesis pe part curinte e 31 milions di invistiments par oparis publichis. Lis jentradis a son di uns 142 milions di euros, plui 1,68 milions dal civanç di aministrazion. L’esecutîf comunâl al ponte a tutelâ i intervents socioassistenziâi e a mantignî lis ativitâts a pro dai zovins, dai anzians e des personis che si cjatin in situazion di disasi. Cun di fat a saran finanziâts i nîts cun 1,67 milions di euros, i intervents pai minôrs e pai centris estîfs cun 657 mil euros, i progjets pai zovins e i intervents pai anzians e pes personis disabilis. Cun di plui, a son stadis confermadis ancje lis spesis par ativitâts culturâls, gjestion dai museus in citât, gjestion dai implants sportîfs; si ten alte la atenzion pes scuelis; al sarà invezit ridusût il servizi de biblioteche civiche.