Presentât il program de “Notte dei lettori. Di lei e di contâ”

Tra lis regjons dal stât talian, il Friûl – Vignesie Julie e je chê cuntune percentuâl di letôrs plui alte. Cun di fat, inte nestre regjon il 56,4% des personis al lei almancul un libri ad an, cuintri di une medie taliane dal 43%. Al è ancje a partî di chest dât che l’assessorât pe culture dal Comun di Udin al à decidût di inmaneâ la “Notte dei lettori. Di lei e di contâ”, là che i protagoniscj a saran propite i letôrs, lis librariis e i libris. Ai 13 di Jugn, di cinc dopodimisdì a miezegnot (17.00 – 24.00), si alternaran une cuarantine di events svilupâts su dîs stazions che a mudaran il centri de citât intun spazi viert dedicât al libri e ae leture publiche. La manifestazion e je coordenade de associazion culturâl Bottega Errante e e previôt events di nature diferente pensâts sei pai fruts plui piçui cun laboratoris e leturis vie pal dopodimisdì, sei pai fantats cun readings e performances sot sere, sei pai plui grancj cun ativitâts che si davuelzaran vie pe gnot. La Gnot dai letôrs si vierzarà e si sierarà sot de Loze dal Lionel, ma se si vûl si pues ancje partî di vie Gemona cui apontaments de librarie par fruts e fantats La Pecora Nera, de librarie Martincigh, de librarie Cluf e de Ucai par spostâsi po te androne della Banca cu lis leturis enogastronomichis de librarie Odos. La Universitât, la Agjenzie Zovins e Kobo Shop si alternaran in plaçute Antonini intant che la biblioteche Joppi i darà acet a scritôrs e grups di leture. La librarie Ubik i darà vite ae stazion di place Marconi, Cjase Cavazzini e sarà vierte fin tart ma e proponarà ancje doi apontaments pai plui piçui, invezit la librarie Moderna e imbastirà lis sôs iniziativis in vie Cavour denant de sô jentrade. La cort di palaç Morpurgo e varà tant che protagoniscj la librarie Mondadori/Angolo della Musica, la associazion Espressione Est e il spetacul Contis Tarondis. Vie Vittorio Veneto e sarà invezit animade des librariis Einaudi, Tarantola e Giunti. “Tant che aministrazion comunâl – al spieghe l’assessôr pe culture Federico Pirone – o vin pensât di imbastî a Udin pe prime volte cheste manifestazion cun chê di incressi il sens di partignince de comunitât dai letôrs e di svicinâ ae bielece di chest mont chei che cumò no lein”.