Servizi Civîl Solidari, ultimis zornadis par partecipâ al bant

Ultimis zornadis par vê acès ai progjets di Servizi Civîl Solidari dal Comun di Udin, che al ufrìs a vot zovins la pussibilitât di svilupâ une prime esperience intal mont dal lavôr e de aministrazion publiche. Cun di fat, al è ancjemò timp fin a misdì e un cuart dai 9 di Jugn par iscrivisi al bant pal Servizi. Il bant al è viert ai zovinis di 16 e di 17 agns residents in Friûl – Vignesie Julie. I zovins a podaran partecipâ al servizi dilunc di dut l’an scolastic, par un totâl di 360 oris o intal periodi estîf par un implei complessîf di 240 oris. 2 zovins a saran impleâts intai centris di agregazion e di partecipazion “Punto Incontro Giovani” e “Officine Giovani”, 2 al Punto Informa, 2 al ufici di Progjet “Citâts Sanis” e altris 2 inte Ludoteche comunâl e al Ludobus. Lis domandis a àn di jessi presentadis alì dal ufici protocol, in vie Lionello 1, viert dal lunis al vinars di nûf mancul un cuart di matine a misdì e un cuart (8.45 – 12.15) e il lunis e la joibe ancje tal dopodimisdì di trê e un cuart a cinc mancul un cuart (15.15 – 16.45).