Iscrizions viertis pai servizis di doposcuele alì de Ellero

A son viertis lis iscrizions pai servizis di doposcuele de secondarie Ellero. A son doi i gjenars di servizi a disposizion, un doposcuele curt e un lunc. Il prin al va di cuant che a finissin lis lezions a dôs e mieze dopodimisdì (14.30) e al previôt la assistence ai arlêfs intant dal gustâ, in plui dal acet e dal control ludic – educatîf. Il secont, invezit, al va indenant fin cinc e mieze dopodimisdì (17.30) e al zonte a chei altris servizis ancje la assistence al studi inte fasse pomeridiane. Par iscrivi i lôr fîs, lis fameis a àn timp fin ai 11 di Jugn par consegnâ i modui di pueste ai educadôrs in servizi intant dal orari di doposcuele. Par cui che si cjate a iscrivi i fîs pe prime volte, si à di telefonâ al numar 0432 271847 di vot e mieze di matine a misdì e mieç (8.30 – 12.30). Il numar al è ancje a disposizion par vê informazions plui in detai sui servizis ufierts e su lis carateristichis domandadis par acedi.