Hospice provisori alì dal Gervasutta

“A pene savude la gnove de sospensive de bande dal TAR dal bant di gare pal hospice provisori, in cunvigne cu la assessore pe salût Simona Liguori, o ai stiçât la Aziende sanitarie par che si cjati fûr daurman une soluzion che e permeti la continuitât de assistence pai citadins”. Cussì – ae fin de riunion che si è tignude vuê a palaç D’Aronco cul diretôr gjenerâl de ASS 4 Giorgio Ros, e cul diretôr dal distret sanitari di Udin Gianna Zamaro – il sindic Furio Honsell al à spiegât l’intervent de Aministrazion comunâl dopo de decision dal Tribunâl Aministratîf Regjonâl di fermâ la gare pal hospice. “La decision de Aziende Sanitarie 4 di dâi acet ai malâts intal Gervasutta – al à zontât il sindic – e garantìs che il servizi nol patissi interuzions e lu insuaze inte rêt urbane des curis paliativis. Une sielte che, cundut che no je definitive, e conferme la strategjie di infuartî a Udin doi centris sanitaris: un alì de aziende ospedaliere-universitarie e chel altri alì dal Gervasutta dedicât a riabilitazion e cronicitâts”.