Tari, il Comun al à judât ancje i operadôrs dal cumierç

Dopo dal intervent dal president mandamentâl de Confcumierç, Giuseppe Pavan, su la metude in vore in comun di Udin de Tari, la gnove tasse su lis scovacis, il sindic Furio Honsell al à rispuindût che “su lis scovacis si à previodût di rivâ a sparagnâ passe 200 mil euros, ma su la fonde des normis che a regolin la Tari no si podeve centrâ cheste cifre suntune categorie sole; chel istès si à cirût di pontâ suntune riduzion plui fuarte des utencis dal cumierç, dai servizis e de industrie, che a paiaran sù par jù il 6% in mancul, propit par slizerî lis fuarcis produtivis e dâ une man ae economie citadine”. I coeficients di fonde par calcolâ la Tari, al à zontât il prin citadin, a son previodûts de leç e i Comuns no puedin cambiâju cemût che àn voie. Par chest trê categoriis comerciâls a àn vût auments – bars, pizariis e buteghis di pomis e verduris – ancje se limitâts propit in gracie des riduzions dal 6% metudis in vore dal Comun.