Inmò 137 puescj disponibii alì dai Centris estîfs

Si puedin prenotâ dai 17 di Jugn ai 23 di Lui i 137 puescj ancjemò disponibii alì dai Centris ricreatîfs estîfs inmaneâts dal Comun di Udin. Plui in detai, intai Centris estîfs par fruts tra i 6 e 11 agns a son disponibii ancjemò 93 puescj – 21 alì de Toppo Wassermann, 22 ae Alberti, 10 ae Pellico, 18 ae S. Domenico, 21 ae Zorutti – ta chei par fruts tra i 3 e i 6 agns a son libars 44puescj: 9 alì de Benedetti, 13 in Baldassarie, 21 ae Volpe, 1 ae Zambelli. Par notâsi si à di lâ alì dai uficis dal Comun di viâl Ungheria 15 là che, dai 18 di Jugn indenant, lis iscrizions a saran viertis dome lis buinoris di lunis, martars e miercus di nûf a misdì. Si ricuarde che i Centris estîfs a cuvierzin, su turnis di 10 dîs, la dade che e va dai 16 di Jugn ai 25 di Avost cun cinc sîts pai grups tra i 6 e i 11 agns e cuatri par chei tra i 3 e i 6 agns. I gjenitôrs interessâts a podaran partecipâ alì dal auditorium Bellavitis a doi incuintris di presentazion de ativitât dai Centris ricreatîfs estîfs, ai 23 di Jugn a sîs sot sere pai Centris pai frutins plui piçui e ai 24 di Jugn, sempri a sîs sot sere, pai fruts plui grancj.