Plui bêçs de Regjon, si sbassaran Tasi e Tari

L’aument dai trasferiments regjonâi ai Comuns comunicât intant de ultime riunion dal Consei des Autonomiis Locâls al à puartât la Aministrazion comunâl di Udin a decidi di rinviâ di cualchi zornade la aprovazion dal belanç preventîf. Cun di fat, a front di un stanziament pal Comun di Udin di plui o mancul 3 milions di euros, l’esecutîf Honsell al à decidût di rinviâ la riunion dal Consei comunâl dai 23 di Jugn che e varès vût di jessi dute dedicade ae aprovazion dal belanç preventîf. “Adun cul sindic Honsell e cul president dal Consei Spiga – e spieghe la assessore pal belanç, Cinzia Del Torre – si à decidût di spostâ di cualchi zornade la riunion par meti dentri intal belanç chest gnûf trasferiment che al permetarà di sbassâ la pression fiscâl di Tari e Tasi”. Chest par vie che une volte fat bon il belanç, e à zontât la assessore, no si varès podût tornâ a meti man aes alicuotis e duncje i nivei di tassazion a saressin restâts chei decidûts cumò.