In Comun si invie la stagjon dal software open source

Il Comun al ponte a rivoluzionâ dut il so sisteme informatic cun software open source simpri inzornât e sparagnant intai prossims agns sù par jù 360 mil euros. La decision e je stade cjapade cuntune delibare de Zonte che e previôt di sostituî i programs Microsoft Office cumò in vore in Comun cul sisteme “Apache Open Office”. “E je une rivoluzion inte suaze de informatiche e dai sistemis informatîfs dal Comun – al spieghe l’assessôr pe inovazion, Gabriele Giacomini – parcè che al ricognòs la impuartance e la validitât di soluzions open che a compagnin la cualitât dal prodot cu la partecipazion di svilupadôrs informatics indipendents e che, in plui di un sparagn economic pes cassis dal Comun, a permetin di vê sistemis informatics simpri inzornâts”. L’obietîf al è chel di rivâ ae fin dal 2015 cul sisteme gnûf in vore su ducj i passe 900 computers doprâts intes diviersis sedis comunâls. Intal 2014 si calcole di formâ al ûs dal sisteme gnûf il 40% dai dipendents comunâi, par puartâ po insom il percors intal 2015.