E siere la Ludoteche, ma si invie “Zuiant a torzeon”

Sabide ai 28 di Jugn la Ludoteche comunâl e siere la stagjon cuntune fieste che e va indenant di cuatri dopodimisdì fin miezegnot, cuntune polse jenfri siet e nûf di sere (16.00 – 19.00 e 21.00 – 24.00). Tes dôs oris di serade dai locâi de Ludoteche, la fieste si spostarà intai zardins del Torso cui zûcs dal Ludobus e cuntun picnic là che ducj a son invidâts a rivâ cun cuviertis, mangjâ e bevi di condividi cui amîs. Se la Ludoteche e restarà sierade fintremai Setembar, cul prin di Lui si invie “In Giro Giocando – Zuiant a torzeon”, il tour dal Ludobus intes areis verdis e intes placis de citât che al varà simpri tant che orari la fasse tra cinc e mieze dopodimisdì e siet e mieze sot sere (17.30 – 19.30). Inte suaze de iniziative, tra Lui, Avost e Setembar, a saran tocjâts ducj i cuartîrs udinês cun 39 apontaments dedicâts al zûc san; i prins a son in program il prin di Lui te aree verde Brun di viâl Vât, ai 2 di Lui alì dal parc Moretti, ai 3 di Lui alì dal parc Ilaria Alpi di vie Melegnano e ai 4 di Lui te aree verde Emilio Salgari di vie del Bon.