A Cjase Cavazzini mostre su la piture taliane dal ’50 al ’70

Inte suaze des iniziativis par valorizâ lis racueltis di art moderne e contemporanie conservadis a Cjase Cavazzini, ai 8 di Fevrâr e je stade screade, al plan tiere de struture museâl, une gnove esposizion che e à par titul “Pittura italiana 1950>1970 dalle collezioni museali”. La mostre, curade di Tanya Candusso e Vania Gransinigh, e à podût jessi inviade ancje in gracie dal dipuesit in comodât di ûs gratuit di une schirie di 22 pituris di mestris talians e furlans dal Nûfcent che a rivin di colezions privadis. La rassegne e met l’acent massime sui mudaments e sui svilups che a àn segnât la piture taliane dai agns subite dopo de fin de seconde vuere mondiâl fin ai agns ’70. Si à cussì la ocasion di viodi oparis leadis al Neorealisim sociâl, tant che la Assemblee di braçants sul Cormôr di Giuseppe Zigaina, ma ancje al moviment de art astrate-concrete promovût dal critic Lionello Venturi, al svilup dal Spazialisim di Lucio Fontana o dal Nuclearisim. Achì o cjatìn nons tant che chei di Emilio Scanavino, Emilio Vedova, Giuseppe Santomaso e Afro Basaldella. Il percors espositîf si siere po cuntune incursion su lis corints e su lis personalitâts artistichis dai agns ’70, cuant che la piture si à cjatade a frontâ une crisi di identitât avonde penze. La mostre e je in calendari fintremai ai 2 di Jugn, cun orari 10.30 – 17.00 dal lunis ae domenie; il vinars e la sabide l’orari si slungje fin a 19.30; il martars invezit la esposizion e je sierade.