Presentât il program di UdinEstate

Presentât vuê martars 1 di Lui il program di UdinEstate di chest an, la rassegne estive inmaneade dal Comun. La edizion di chest an e previôt plui di 150 events cu la musiche, il teatri, la danze, lis leturis e lis rassegnis espositivis curadis dai Civics Museus. Cun di plui cheste Istât an a tornin ancje i concierts intal plaçâl dal Cjistiel, in graciis di un contribût di AcegasApsAmga di 30 mil euros. La manifestazion e cjaparà dentri ducj il centri storic e i diviers cuartîrs de citât, ancje se la plui part dai events e je in program inte cort di palaç Morpurgo in vie Savorgnana. Diviersis lis rassegnis in program di Dulinvie-Percors di culture plurâl in Friûl al festival dai artiscj di strade e ae rassegne “Burattini senza confini”, dal Homepage festival al parc dal Cormor al apontament cun Udin&Jazz e Folkeste la Notte Bianca ai 11 di Lui. Tancj ancje i apontaments tant che “Armonie in corte”, “UdinEstate Bambini”, lis propuestis di Anà-Thema Teatro, lis “Letture in corte” e lis seradis di CineCittà intes circoscrizions. Tra lis novitâts di chest an la rassegne di teatri, danze, cjant e musiche de academie teatrâl Nico Pepe. Diviers i concierts intes placis e intai teatris de citât. Dutis lis informazions si cjatin intal sît dal Comun (www.comune.udine.it), par informazions al è pussibil clamâ il PuntoInforma al numar 0432/414717.