Presentât il program des mostris dai Museus civics

Al è stât presentât il program des mostris che i Museus Civics dal Comun di Udin a àn imbastît di cumò al principi di chest an che al ven. Si partìs cuntune mostre a pene screade alì de ex glesie di S. Francesc che e restarà vierte fintremai i 13 di Lui, ven a dî “Oasis Photocontest – tour 2014” dedicade ae fotografie naturalistiche. La esposizion “Gli ultimi sogni. Udine 1900-1914”, che e vierç al public ai 3 di Lui intes Galariis dal Progjet di palaç Morpurgo, e propon une “visite” te Udin dal imprin dal Nûfcent. Ai 4 di Lui e vierç ancje la personâl sui “Colori di Franco Fontana” alì de Galarie fotografiche “Tina Modotti”, che si podarà viodile fintremai i 7 di Setembar. “Rebus Caravaggio. Il San Francesco che riceve le stigmate di Udine” e sarà vierte dai 12 di Lui ai 30 di Novembar te sale XIII de Galarie di Art Antighe dal Cjistiel. A Cjase Cavazzini, invezit, dai 13 di Lui fin ai 21 di Setembar si varà la esposizion “I segni nascosti. Taccuini e album di Melli, Scipione-Mafai-Raphaël-Fazzini 1905-1963”. Inte seconde metât dal an il Museu Etnografic dal Friûl al proponarà “Crudo&cotto. La fortuna della ciotola. Dagli scavi di via Grazzano al design Galvani”. Palaç Giacomelli al sarà ancje la suaze là che, in ocasion di Friuli Doc, si podarà viodi la mostre “Torchi e cultura vinaria nel mediterraneo”. Dai 4 di Otubar ai 7 di Dicembar Cjase Cavazzini i darà acet ae mostre dedicade al artist furlan Riccardo De Marchi. In Cjistiel, a partî dai 8 di Otubar e fintremai i 22 di Fevrâr dal 2015 si varà la mostre “Adriatico senza confini: via di comunicazione e crocevia di popoli nel 6000 a.C” par compagnâ la XLIX riunion sientifiche dal Istitût Talian di Preistorie e di Protostorie. Cun Dicembar il Museu Etnografic al propon une personâl sul grant mestri artesan Alberto Calligaris. Par finî, tal stes mês, a Cjase Cavazzini si scree une esposizion dedicade ae “gnove piture in Italie” dai agns Sessante (Fontana, Manzoni, Paolini, Schifano, Griffa, Verna, Morales) aes tendencis espressivis plui resintis rapresentadis de art minimal (Ryman, Mangold, Martin, Support Surface).