Presentât il program de Gnot Blancje dai 11 di Lui

Vinars ai 11 di Lui, la vilie dai sants patrons de citât Macôr e Fortunât, e torne la Gnot Blancje. Pal event, inmaneât par dâ une man al cumierç citadins e ai salts estîfs, il Comun di Udinal à metût in cjamp un program siôr di apontaments che, fin a 2 di gnot, a daran vivôr aes viis e aes placis de citât. Tra lis novitâts di chest an si à la presentazion de formazion 2014-2015 dal Udin, in program a vot di sere (20.00) sul splaç di place Libertà. Par valorizâ i tesaurs de citât, i Museus Civics dal Cjistiel, Cjase Cavazzini, la Galarie Fotografiche “Tina Modotti”, lis Galariis dal Progjet di palaç Morpurgo e la ex glesie di S. Francesc a restaran vierts fintremai undis di sere (23.00) ancje cun visitis vuidadis di pueste. No mancjin po lis mostris temporaniis tant che “Rebus Caravaggio”, che si vierç in Cjistiel propit ai 11 di Lui, ma ancje la esposizion su Franco Fontana alì de Galarie “Tina Modotti”, “Oasis Photocontest, Tour 2014” in S. Francesc o la mostre su la Udin de Biele Époque tes Galariis dal Progjet. Ae liste dai apontaments culturâi si zontin po “Trame liberate” (19.00, slarc Ospedale vecchio), “Chiacchiere di corte” (20.30 e 22.00, Cort Morpurgo), “In viaggio con Alessandro Manzoni” cu atôr e regjist Massimiliano Finazzer Flory (plaçute Marconi e biblioteche Joppi). Il program musicâl invezit al propon in place Venerio (21.00) Carnicats, Mole Moonwaktet e Trama, in place Libertà la “Big Band – Musicisti entusiasti” (21.00), in place XX Settembre la Azzurra Dance (21.00), in place S. Jacum prime “Zumba in bianco” (20.00) e po “digei Angelo” (22.30), intant che dilunc des viis dal centri storic si varà la “Compagnia del Carro” di Starançan cu lis sôs animazions e i siei zûcs di strade. Diviersis ancje lis propuestis pai plui piçui tant che il laboratori “Sporchiamoci le mani” (18.00, place Venerio), “Il Villaggio dei Puffi” (19.00 – 23.00, Marcjât Vieri), i laboratoris de “Notte al museo” (21.00 – 23.30, Pinacoteche dal Cjistiel) e, par finî, la “Notte Bianca…in Ludoteca” (20.30 – 23.00). Di nûf di sere a une di gnot (21.00 – 01.00) si varà la pussibilitât di acedi, cence paiâ ai parcs machine in struture Magrini, Tribunâl, Andreuzzi, Caccia, Moretti e Venerio. Il program complet de manifestazion si lu cjate sul sît internet www.comune.udine.it.