Protocol di intese par prevignî lis gnovis puaretâts

Comun, Cjamare di Cumierç, Confcumierç, Confartesanât, Legacoop, Confcooperativis, Confapi e Confesercents di Udin a àn sotscrit vuê, joibe ai 17 di Lui, un protocol di intese teritoriâl par promovi progjets che a judin a prevignî lis gnovis puaretâts. Si trate di une iniziative che e va daûr di un implant di ‘comunitât solidarie’ e che e ponte a lavorâ adun par svilupâ adun progjets inovatîfs par fâi cuintri ae cressite dai câs di esclusion sociâl e par judâ l’inseriment lavoratîf des personis che si cjatin in situazions di disasi economic. Il test del protocol, che si svilupe su trê agns, al previôt che il Comun al intervegni daurman cun 50 mil euros par meti fûr in curt un bant par borsis lavôr straordenariis cun valôr sociâl. Tra lis primis azions in program si à po ancje il potenziament dai sportei di informazion e di indreçament des personis impegnadis a cirî fûr un lavôr. “Al è simpri plui urgjent ufrî un inseriment lavoratîf pes personis che si cjatin in dificoltât par vie de recession economiche – al à dite il sindic Furio Honsell – e par chest al è impuartant che ducj si impegnin par creâ des oportunitâts: il Comun di Udin al à metût a disposizion des borsis lavôr, ma al è impuartant sensibilizâ i operadôrs economics par che i lavoradôrs a puedin cumò zovâsi di chest strument”.