Presentadis lis novitâts “2.0” di Friuli Doc

A son stadis presentadis vuê di matine intune conference stampe inte sale dai Riceviments dal Comun lis novitâts “2.0” principâls de edizion di chest an di Friuli Doc, manifestazion in program dai 11 ai 14 di Setembar. Ae conference stampe a jerin presints il sindic, Furio Honsell, l’assessôr pes ativitâts economichis e turistichis, Alessandro Venanzi e i rapresentants dai sponsor principâi di cheste edizion. Un sît internet gnûf, un cjanâl youtube, une pagjine facebook e une alicazion plui inzornade e interative par celulârs e tablet . A son chestis lis novitâts principâls de vincjesime edizion di Friuli Doc. 2 i sponsor gnûfs, ven a stai Turismo FVG e une agjenzie di comunicazion, Creaa, confermât il contribût di CrediFriuli e Inovactor e la colaborazion cun Goccia di Carnia e cul Ersa.