50 mil euros par sostignî il servizi doposcuele

Il Comun al darà un contribût di 50 mil euros par sostignî lis spesis des fameis peadis ai servizis di doposcuele. Lu à decidût îr la zonte comunâl. Il contribût al cuvierzarà une part des spesis peadis ae Cjarte famee sui servizis dal doposcuele intes scuelis de infanzie, primaris e secondariis di prin grât. A varessin di sei 550 lis fameis che a gjoldaran dal finanziament. I contribûts a saran ativâts di ufici aes fameis residentis intal Comun in regule cu la iscrizion dai fiis al servizi doposcuele pal an scolastic 2014-2015 e in possès de Cjarte famee. Il scont al sarà di une mensilitât pes fameis cuntun fi a caric, di 2 mensilitâts pes fameis cun 2 fîs a caric e di cuatri mensilitâts pes fameis cun 3 o plui fîs. Il benefici al larà di un minim di 9,30 euros pes fameis cuntun fi a caric a un massim di 204 euros pes fameis cun 3 o plui fîs a caric iscrits al doposcuele cu la partecipazion minime. Intal câs de partecipazion massime il contribût al larà invezit di un minim di 12,65 euros a un massim di 312 euros.