Al va indenant il zîr dal Ludobus tai cuartîrs

Al va dilunc ancje te prime setemane di Avost “In giro giocando – Zuiant a torzeon”, il percors dal Ludobus tes areis verdis, tai parcs e tes placis de citât. Il prossim apontament al è fissât par martars ai 5 te aree verde Marcello D’Olivo in viâl Afro, par lâ po indenant miercus ai 6 te aree verde Peter Pan in vie di Brazzà, joibe ai 7 te aree verde ex Vivaio Giorgini e vinars ai 8 te aree verde Villacaccia, alì des viis Campoformido e Villacaccia. Ducj i events si davuelzaran di cinc e mieze a siet e mieze sot sere (17.30 – 19.30). A tacâ di cumò e fintremai la metât di Setembar a son 39 i apontaments in diviers lûcs de citât. Lis ativitâts proponudis a laran de animazion ai zûcs di moviment, de scuele di piçul circ aes Crazy Funny Bikes, dai laboratoris di costruzion di mosaic ai zûcs di aghe. Tal câs che al sedi brut timp lis ativitâts si davuelzaran te Ludoteche comunâl di vie del Sale. Par informazions: Puntoinforma (0432 414717) e Ludoteche (0432 271677).