Al torne il Festival internazionâl dai artiscj di strade

Dopo dal sucès des primis dôs edizions al torne ancje chest an, simpri inte suaze di UdinEstate, il Festival internazionâl dai artiscj di strade. L’apontament, in program intal centri storic di Udin ai 5 di Setembar, al jentre inte rêt dai festivals dai artiscj di strade che e cjape dentri S. Vît dal Tiliment ai 6 Setembar e Starançan ai 7 di Setembar. In place si viodaran duncje acrobats, balarins, contorsioniscj, mangjefûc, gaugars, trasformiscj e ogni sorte di artiscj di strade che a rivin di Argjentine, Austrie, Brasîl, Cravuazie, Cile, Friûl, Gjapon, Italie, Montenegro, Ream Unît e Spagne. A inmaneâ il festival e je la “Compagnia del Carro” di Starançan adun cu la associazion “Circo all’incirca” di Udin e cu la partecipazion dal “New Faboulouse Circus Copernicus”. Par dut il dopodimisdì dai 5 di Setembar, a tacâ di cuatri e mieze (16.30), il centri storic di Udin al sarà animât dai spetacui di passe 20 grups e di 60 artiscj. Tantis duncje lis esibizions che si davuelzaran tes viis Cavour e Canciani, e tes placis Libertà, Lionello, S. Jacum e XX Settembre là che a undis di sere (23.00) e je in program la grande fieste finâl. Cetantis ancje lis ativitâts e i apontaments pai fruts che si centraran in place Libertà tra trê e siet e mieze (15.00 – 19.30). No mancjaran nancje i zûcs e lis animazions proponudis dai operadôrs dal Ludobus in place S. Jacum tra cinc e siet sot sere (17.00 – 19.00). Al festival al è leât ancje il concors fotografic “BuskerShot…cogli l’attimo! Foto contest”. Par informazions plui in detai si pues contatâ il PuntoInforma di vie Savorgnane 12 (0432 414717).