Acuardi turistic cu la Carinzie

In gracie di un acuardi tra l’Assessorât pal turisim dal Comun e la Agjenzie turistiche dal guvier carinzian ogni dì, dai 15 di Setembar ai 8 di Otubar, si fermaran a Udin 3 o 4 corieris cun sù par jù 150-200 turiscj che a àn di lâ in Slovenie. “E je une grande oportunitât par fâ cognossi lis bielecis de nestre citât ancje par di là dal confin – al spieghe l’assessôr comunâl pes ativitâts economichis e pal turisim, Alessandro Venanzi – ma ancje par ufrî une ocasion comerciâl pes realtâts economichis udinesis”. Simpri in teme di promozion de citât, inte suaze de vincjesime edizion di Friuli Doc in program dai 11 ai 14 di Setembar, Udin i darà acet a di une delegazion uficiâl di trê citâts zimuladis, Esslingen am Neckar (Gjermanie), Vienne (France) e Villach (Austrie).