Fûr la liste dai incarics professionâi assegnâts dal Comun

Sul sît internet dal Comun e je disponibile la liste dai incarics professionâi assegnâts de aministrazion inte seconde metât dal 2012. Si fevele in dut di 719 mil euros: une cifre plui gruesse rispiet a chê dai prins sîs mês, propit par vie de tempistiche leade ae assegnazion di chestis incarghis, ma plui basse se si le confronte cun chê de seconde metât dal an prime. Il pês plui grues al è chel pai incarics assegnâts par lavôrs publics, ven a dî alc di plui di 539 mil euros, o sei plui di doi tierçs dal totâl. Lis cifris che la aministrazion comunâl e je daûr a meti su chest front a son daûr a sbassâsi an dopo an, baste pensâ che intai agns 2005/2006 lis spesis par incarics professionâi a passavin i 3 milions di euros, intant che za intal 2010 si jere pôc disot dal milion e 400 mil euros.