Si pues votâ Udin al concors “Comune partecipativo”

Ancje il Comun di Udin al partecipe al concors talian “Comune partecipativo” che si insuaze intal Salon de responsabilitât sociâl di imprese e de inovazion sociâl. Lu fâs cul progjet “Udine Greenways” che al è stât svilupât adun cui Comuns di Cjampfuarmit, Martignà, Pasian di Prât, Paulêt, Puçui, Tavagnà e Tresesin. Par votâ la iniziative furlane baste inviâ un tweet che al cjapi dentri i riferiments a @CSRIS_it @ConsorzioCIAL #compart #CSRIS14, il numar dal progjet, ven a dî il 9, e un messaç curt par promovilu (par esempli: @CSRIS_it @ConsorzioCIAL #compart #CSRIS14 n° 9 – une ideone par promovi il teritori). Cui che al vote al pues vinci une “ricicletta®”, o sei la biciclete metude dongje riciclant uns 800 latinis di alumini. Par votâ al è timp fintremai i 28 di Setembar.