Screade la Dante, la prime scuele primarie dal sport

E je stade screade îr, martars 22 di Setembar, dal portîr dal Udin, Simone Scuffet, la scuele Dante, la prime scuele primarie dal sport di Italie. Îr al è ancje stât presentât e al tacât il progjet sperimentâl “Scuola in movimento” metût adun dal Comun e dal 3° istitût comprensîf in colaborazion cul ufici provinciâl Educazion motorie, fisiche e sportive, cul comitât Dante, cu la parochie dal Carmine, cu la associazion Genitori Comunità Educanbte, cu la facoltât di Siencis Motoris de Universitât dal Friûl, cul Coni, cul dipartiment prevenzion de ASS 4 dal Friûl di Mieç e cu la fondazion Crup. Il plan, che al à l’ obietîf di valorizâ la ativitât fisiche e il sport, al previôt che i alums a vedin la pussibilitât di davuelzi almancul un ore al dî di ativitât fisiche. Il progjet al sarà in vore par 5 agns e al cjaparà dentri duncje dutis lis classis, de prime ae cuinte.