Bant par assegnâ sedis aes associazions

Rivât insom il restaur de palacine dal comant de ex caserme Osoppo, cumò al è stât publicât sul sît dal Comun di Udin il bant pe assegnazion in concession di ûs dai locâi di doprâ tant che sede di rapresentance des associazions. La domande e podarà jessi presentade des associazions che a àn la lôr sede uficiâl a Udin o che ta chest comun a davuelzin la plui part de lôr ativitât. Par facilitâ la graduatorie, lis associazions a son stadis dividudis in plui setôrs: socioassistenziâl e sanitari; culture, art, turisim e integrazion; sport; ex combatents, di arme e di polizie; altris ativitâts. Al bant no puedin invezit partecipâ partîts politics, associazions sindacâls o professionâls, associazions che a àn ancje finalitâts di vuadagn. I locâi di assegnâ a van dai 18 ai 22 metris cuadrâts, ma a saran po a disposizion ancje salis plui grandis di ûs comun. Il cjanul di afit al sarà di 2,94 euros par metri cuadrât ogni mês. La durade de concession e je di cinc agns. Lis domandis a àn di jessi presentadis dentri di misdì e un cuart (12.15) dai 30 di Otubar. Il modul pe domande e dutis lis informazions in detai par partecipâ a son a disposizion sul sît Internet dal Comun.