Incuintri tra sindics par meti adun un gnûf Ambit udinês

“Si à di cjalâ al avignî des autonomiis locâls cence prejudizis puntant a meti in comun chei servizis e chês infrastruturis che a permetaran di sbassâ i coscj e di rendi plui eficient dut il sisteme”. Chest il messaç dal sindic di Udin, Furio Honsell, ai coleghis dal Comuns dulintor che si son cjatâts îr a palaç D’Aronco par tacâ a resonâ sui efiets de gnove leç regjonâl che e riforme il sisteme des autonomiis in Friûl – Vignesie Julie. La Aministrazion udinese e à clamât dongje i rapresentants di chei Comuns che, adun cu la capitâl furlane, a varessin di formâ un Ambit teritoriâl di 200 mil abitants. Al invît a àn rispuindût i Comuns di Buri, Cjampfuarmit, Martignà, Pasian di Prât, Paulêt, Pradaman, Puçui, Reane, Remanzâs, Tavagnà e Tresesin. Il progjet che si vûl imbastî al ponte a meti in comun un ciert numar di servizis, mantignint però la autonomie dai diviers Comuns, plui o mancul cemût che al sucêt pal Ambit socioassistenziâl e pal Sportel unic. Tra i cjamps che si volarès cjatâ une aministrazion condividude si à mobilitât, cumierç, edilizie privade e culture. “La autonomie dai Comuns – al à zontât Honsell – e sarà sigurade dal sisteme de dople maiorance che al tutele sei i Comuns grancj che chei piçui”.