Joibe belanç e anticipazions su “CamminaMenti”

Ae fin de prime fase de tierce edizion dal progjet “CamminaMenti… le menti in cammino” al è in program un apontament par presentâ un prin belanç de iniziative e ancje i percors gnûfs che a tacaran cun Zenâr in dutis lis circoscrizions de citât. Cun di fat “CamminaMenti”, il program che al propon percors di stimolazion cognitive par deventâ viei in salût, al tornarà in Zenâr cun cetancj zûcs e esercizis par tignî in ativitât lis personis cun plui di 65 agns. L’apontament si tignarà joibe ai 18 di Dicembar a trê dopodimisdì (15.00) in sale Ajace cu la partecipazion dal sindic Furio Honsell, de coordenadore dal ufici comunâl “Citâts Sanis” Gianna Zamaro, de presidente de associazion Alzheimer Mariangela Benedetti Esente, e de ricercjadore de universitât di Udin Laura Pagani. L’incuintri al è viert a ducj.