Par Nadâl instalazions, percors a teme e animazions

Dai 17 di Dicembar indenant, il centri di Udin si vistìs di Nadâl cun instalazions artistichis che a proponin leturis diviersis di cheste fieste e cun altris iniziativis a teme. Un tant in gracie dai vincidôrs dal trê avîs di gare dal Comun che a metevin a disposizion in dut 12 mil euros. Intes viis dal centri a cjatin acet lis oparis dai cinc artiscj (Micol Brezigar, Compagnia degli specchi, Francesco Qualizza, Lara Trevisan, Simone Miani) selezionâts dal ufici turisim e marketing urban dal Comun che a insioraran la citât par dutis lis fiestis. In gracie dal secont avîs di gare a son stâts svilupâts dai percors turistics che a contin la citât a partî dal teme des sôs aghis e dai siei spazis verts. La tierce iniziative e je dedicade invezit ae animazion su strade pai fruts che, intal dopodimisdì di sabide ai 27 di Dicembar, e previôt un percors a torzeon tra place S. Jacum e la Loze dal Lionel prime a 15.30 e po a 17.30. Intal dopodimisdì di sabide ai 20 di Dicembar, invezit, i cjants di Nadâl a jemplaran lis stradis dal centri in gracie dai Pueri Cantores di Udin e di une corâl zovanîl di Tulmin.