Fin ai 22 in vore lis misuris par sbassâ l’incuinament

La Agjenzie Regjonâl pe Protezion dal Ambient e à comunicât al Comun che de miezegnot dai 19 di Dicembar ae miezegnot dai 22 di Dicembar si previôt un superament dal valôr limit fissât de leç pai polvars lizêrs (Pm10). Par cheste reson la Aministrazion comunâl e vise che ta chestis zornadis si metaran in vore lis misuris previodudis dal Plan di azion comunâl par limitâ l’incuinament atmosferic. In plui dal invît a limitâ l’ûs dai veicui, si previôt l’oblic di sbassâ di 20 a 18 grâts lis temperaduris mediis intai edificis. La proibizion no vâl pai edificis in categorie B o plui alte, par chei là che a son struturis sanitariis o scuelis, e pai alozaments là che a vivin personis che a patissin di malatiis cronichis.