Silvia Iesse in mostre te suaze des “Invasions artistichis”

A tornin lis “Invasions artistichis”, la iniziative metude adun des Officine Giovani dal Comun di Udin cu la cooperative Aracon e cun diviersis realtâts culturâls ativis in citât. La rassegne e nas cun chê di ufrîi plui visibilitât ai zovins artiscj furlans cul meti in mostre lis lôr oparis te biblioteche “Joppi” e in altris lûcs de citât. Ta cheste suaze, dai 13 di Zenâr e fintremai la fin di Fevrâr, lis oparis di Silvia Iesse, artiste di S. Denêl diplomade alì de Academie des Bielis Arts di Vignesie, a saran in vision alì de sale Corgnali de biblioteche (Riva Bartolini 5) il lunis di dôs dopodimisdì a siet sot sere (14.00 – 19.00), dal martars al vinars di vot e mieze di buinore a siet sot sere (8.30 – 19.00) e la sabide di trê dopodimisdì a siet sot sere (15.00 – 19.00). Altris oparis de artiste furlane a saran in mostre alì dal ristorant “L’oris” (via Manin 13), dal lunis ae sabide di nûf di buinore a siet sot sere (9.00 – 19.00).