Azions cuintri dal smaltiment abusîf des scovacis

169 personis identificadis, 115 veicui controlâts, 14 sanzions aministrativis dadis fûr e 3 denunciis presentadis: a son juste un pocjis des cifris plui significativis che a àn segnât la ativitât puartade indenant de polizie locâl di Udin tra il prin di Avrîl e i 31 di Dicembar dal 2014 par fâi cuintri a cui che al discjarie lis scovacis in maniere abusive. I dâts a son stâts presentâts vuê, miercus ai 14 di Zenâr, intune conference stampe tignude di rapresentants de Aministrazion comunâl, de polizie locâl e de Net. Ta chescj nûf mês i agjents a àn fat 68 sorelûcs intes discjariis e 155 controi par materiâi bandonâts fûr dai casselots pes scovacis. Une vore di atenzion e je stade po metude par evitâ che citadins che a son a stâ in altris Comuns a discjariassin lis lôr scovacis a Udin. Chestis ativitâts di control a àn permetût di meti jù une liste dai dodis sîts là che plui dispès a vegnin bandonadis scovacis in maniere abusive, ven a dî lis viis Forgaria, Flagogna, Modolêt, Galliano, Tessitori, della Braida, Jalmicco, dei Prati, San Gottardo, Cividale, Cerneglons e Rizzolo. Propit achì a saran centrâts i intervents decidûts dal Comun par discorazâ chestis azions, cun lavôrs par 28 mil euros. Cun di fat, lis scovacis bandonadis a son un probleme ancje pes cassis dal Comun che par smaltîlis po te maniere juste al à vût di spindi 47 mil euros intal 2013 e altris 66 mil vie pal an passât.