Indenant la ricualificazion dai implants sportîfs

Al va indenant il program di ricualificazion dai implants sportîfs de citât e, dopo de consegne dai lavôrs pes gnovis tribunis di viâl dello Sport, la aministrazion comunâl e à impegnât cumò un milion e 400 mil euros par meti a puest o miorâ altris cinc complès sportîfs udinês. L’intervent plui grues si riferìs al implant di vie Pradamano là che a son previodudis oparis par sù par jù un milion di euros. Plui in detai si tornaran a fâ lis tribunis, i camarins e i spazis di ûs comun dal implant. Si proviodarà po ae manutenzion straordenarie de piste di atletiche e incressi la eficience energjetiche dai edificis. Intes prossimis zornadis il Comun al darà fûr il bant di gare di mût che i lavôrs a puedin tacâ za cul prin tacâ di Avrîl. Simpri in vie Pradamano a son za rivâts insom i lavôrs di sistemazion dal implant par scliciâ e de pissine. A son invezit daûr a finî i intervents programâts alì dal complès sportîf in Cormôr Bas e ta chel di vie Barcis là che i lavôrs par modernizâ l’implant a àn domandât une spese di 327 mil euros.