Belanç comunâl, in 4 agns sbassât di un cuart il debit

Il sindic di Udin, Furio Honsell, al à presentât i ultins dâts sul sbassament dal debit de bande dal Comun. Tra il 2010 e il 2014 la Aministrazion comunâl e à rivât a taiâ il debit complessîf dal ent dal 25%, passant dai 163 milions dal 2010 ai 124 milions dai 31 di Dicembar dal an passât. “In rispueste al sburt rivât dal pat di stabilitât e dai gnûfs vincui di belanç imponûts dal guvier talian, il Comun di Udin al à savût sbassâ in cuatri agns cuasi 40 milions di debit: un risultât – al dîs il prin citadin – che al conferme lis capacitâts de nestre struture e de aministrazion”. Cun di plui, ancje denant de impussibilitât di inviâ altris mutuis, il Comun al è lât indenant a invistî risorsis. “Chel che si à a pene sierât al è stât un an di svolte – al zonte Honsell – dal moment che, pe prime volte, si à limitât il debit sot des jentradis”. Par dongje, e riferìs la assessore pal belanç, Cinzia Del Torre, cul vê un belanç san o sin daûr a paiâ ducj i mutuis fats pes oparis bublichis intai agns passâts cence ritarts.