Ultins dîs par compilâ il cuistionari sul centri de citât

A son chestis lis ultimis oris buinis pe compilazion dal cuistionari sul centri de citât metût jù dal Comun par fâ une rilevazion su compuartaments e valutazions di citadins e operadôrs economics. Di fat al è timp fin a miercus ai 21 di Zenâr par pandi un parê sul sît www.comune.udine.it/indaginecentro2014. L’obietîf de ricercje, che e à tirât sù za passe mil cuistionaris compilâts, al è chel di rilevâ i compuartaments e lis preferencis su cemût movisi, tai acuiscj, tal timp libar e lis valutazions su la ufierte e lis cundizions atuâls dal centri de bande di cui che lu vîf par lavôr o altris motîfs. I risultâts, cun elaborazions e coments, a saran po dopo publicâts sul stes sît dal Comun e al vignarà fat un confront cuntune rilevazion similâr fate tal 2006.