A tornin i glons dai Umigns des oris

Dopo dal restaur, vinars ai 30 di Zenâr a cinc dopodimisdì (17.00) i doi Umigns des oris di place Libertà a tornaran a bati lis oris. Dopo dai prins glons, sul splaç dal cjistiel, al scomençarà il conciert curât de Associazion Scampanotadôrs Furlans che i vignarà daûr, a sîs sot sere (18.00), la scree de mostre fotografiche “Udine, una città di campane” alì de Cjase de Fradaie, simpri sù in Cjistiel. La esposizion, curade de diretore dal museu dal Domo Maria Beatrice Bertone adun cun Paolo Tosolini dai museus civics di Udin, e restarà vierte al public vinars ai 30 di Zenâr di dôs e mieze a cinc dopodimisdì (14.30 – 17.00), sabide ai 31 di Zenâr e domenie prin di Fevrâr di dîs e mieze a misdì e mieç e po di dôs e mieze a cinc dopodimisdì (10.30 – 12.30 e 14.30 – 17.00), e martars ai 3 di Fevrâr di nûf di matine a cinc dopodimisdì (9.00 – 17.00).