I risultâts de inchieste sul centri

Al à une etât medie sui 40 agns, al va in centri almancul 2 o 3 voltis par setemane massime par fâ une cjaminade, comprâ alc o lâ intun locâl. Par movisi al dopre plui di dut la bici o la machine che al lasse intai puescj dilunc de strade o tes struturis a paiament. I plasin i grancj events tant che Friuli Doc, Vicino/Lontano e il Far East, ma no i displasin nancje i marcjaduts. Al stime che Udin al sedi une citât nete e sigure, ma al varès gust di vê une ufierte di prodots e di servizis plui largje e, magari, ancje cun presits un tic plui bas. Al è chest il ritrat medi che al ven fûr de inchieste fate dal Comun di Udin suntun campion di 1.490 tra operadôrs e personis che a frecuentin il centri de citât. Trê cuarts dai intervistâts a son a stâ a Udin, chei altris invezit a rivin di altris comuns de provincie. Il scandai, che si insuaze intes iniziativis pal svilup dal “centri comerciâl naturâl”, al è nassût ancje cu la colaborazion di Confartesanât, Confcumierç, consorzi Amici del Centro e la associazion UdineIdea. Cheste inchieste – al à spiegât l’assessôr pes ativitâts economichis e pal turisim Alessandro Venanzi – e coventarà ancje par indreçâ miôr la nestre azion aministrative e pe gjestion dai fonts “ex Pisus”.