Informagiovani, i dâts su la ativitât dal 2014

Al à tra i 20 e i 30 agns, un nivel di istruzion alt, al cîr informazions leadis soredut al marcjât dal lavôr ma ancje su timp libar, massime sui viaçs. Al è il ritrat dal utent medi dal Informagiovani dal Comun di Udin, cemût che al ven fûr di une inchieste su la cualitât dal servizi che e à cjapât sù lis rispuestis di uns dusinte dai utents dal sportel pai zovins. I dâts a mostrin che alì dal Informagiovani a cressin plui di dut i fantats sot dai 19 agns e chei cun plui di 30 agns e che, pe plui part (71%) a son a stâ a Udin. Dilunc vie dal 2014 alì dal Informagiovani si àn vûts 21.227 acès, cuntun aument rispiet an prime. A son stâts invezit 804 i apontaments alì dal sportel par vê un indreçament sul lavôr. Tra l’altri, propit il contat diret cul operadôr al reste il sisteme plui doprât dai utents par vê informazions (38%). L’81% di lôr al declare di vê vût zovament dai servizis ufierts dal sportel. Si ricuarde che par vê informazions plui in detai su chest servizi si pues ancje lâ sul sît internet dal sportel alì de direzion www.informagiovani.udine.it .