Alì dal Menossi a tornin i films de mont

Ancje chest an l’assessorât pal decentrament dal Comun, adun cul Dopolavôr Feroviari e cu la Societât Alpine Furlane, al propon la rassegne dai “Films de mont” cun cuatri seradis dedicadis al alpinisim che si davuelzaran dai 6 ai 27 di Fevrâr alì dal auditorium Menossi. A screâ la manifestazion, vinars ai 6 di Fevrâr a nûf di sere (21.00), a saran i films “Verso dove” di Luca Bich e “High Tension” di Zachary Barr. Ancje ai 13 di Fevrâr si varan doi cines, ven a dî “Mezzalama maratona di ghiaccio” di Angelo Poli e “Loslassen” di Franz Walter. Ai 20 di Fevrâr invezit si varà un incuintri cul esploradôr Michele Pontrandolfo che al contarà de sô traviersade de Groenlande. A sierâ la rassegne ai 27 di Fevrâr e sarà la proiezion dal film di Pere Herms “Els homes que volien pujar una muntanya de més de 8.000 metres”.