Lis iniziativis par “M’illumino di meno”

Ancje chest an il Comun di Udin al aderìs ae campagne “M’illumino di meno”, inviade de trasmission di Radio2 “Caterpillar”, e vinars ai 13 di Fevrâr al distudarà, tra sîs e nûf di sere (18.00 – 21.00), lis lûs dal cjistiel e dai edificis dulintor. La iniziative, che e ponte a sensibilizâ i citadins su la impuartance dal sparagn energjetic, si insuaze intal program di azions di politiche energjetiche che il Comun al à inviât zaromai di agns. Chest an o vin volût dâ un segnâl ancjemò plui fuart di adesion ae iniziative – a spieghin i assessôrs Raffaella Basana e Enrico Pizza – cul slungjâ di une a trê lis oris che lis lûs a restaran distudadis. Par “M’illumino di meno” vie pal dopodimisdì, di trê fin sîs (15.00 – 18.00), la Ludoteche e proponarà diviersis iniziativis par piçui e grancj par stiçâ la riflession sul sparagn energjetic. La Ludoteche e à po in program ancje altris iniziativis alì dai Zardins dal Tors, par esempli a sîs mancul un cuart (17.45) i darà acet ae corâl dai students dal “Copernico”, e a sîs (18.00) a saran liberâts un pôcs di lumins su lis aghis dal zardin. La Biblioteche civiche e inmanee invezit dôs iniziativis batiadis “Nel buio ti ascolto”: alì de sezion pai plui zovins, di cinc fin sîs dopodimisdì (17.00 – 18.00), si proponaran lis contis a scûr dedicadis ai fruts tra i 5 e i 8 agns; alì de sezion moderne, tra sîs e mieze e siet e un cuart sot sere (18.30 – 19.15), i atôrs dal Teatro Sosta Urbana a metaran adun un spetacul leterari. Di nûf e mieze a undis e mieze di sere (21.30 – 23.30) lis Officine Giovani dal Comun a proponin in plaçâl Valle del Bût il conciert acustic di un grup di zovins artiscj udinês. Ae iniziative e aderìs ancje aBicitUdine che, in larc dei Pecile di cinc dopodimisdì a vot di sere (17.00 – 20.00), i siei “mecanics” volontaris a ufrissin un control des lûs e conseis par miorâ la lôr sigurece a ducj i cicliscj che a àn voie. A vot di sere (20.00) e je invezit in program une pedalade dilunc des pistis ciclabilis de citât.