Za completade la cabladure in fibre otiche de citât

In gracie di un acuardi sotscrit dal Comun cun Telecom Italia dut il teritori de citât al è cumò cablât in fibre otiche, par altri cun diviers mês di anticip sui timps previodûts. Cui siei 240 chilometris di fibre, la capitâl furlane e je une des primis citâts dal stât talian a vê puartât insom il percors de cabladure. Une vere autostrade digjitâl che si slargje di sîs centrâls logadis a S. Gotart, a S. Domeni, in Baldassarie, in Cjavriis, in centri e su viâl Venezia, par rivâ a 281 terminâi stradâi che a ufrissin al utent une velocitât di conession di 30 Mbit al secont che e permet di doprâ i servizis di ultime gjenerazion. Une ufierte che, par altri, e risulte di atrat ancje pes impresis. La Aministrazion comunâl e à invistît pe operazion 2 milions di euros e, par garantî un impat ambientâl il plui bas pussibil, si è poiade in buine part su lis rêts tecnologjichis che za a esistevin. Par chel che lu rivuarde, il Comun al doprarà la fibre otiche par meti in rêt ducj i uficis e lis diviersis sedis comunâls.